ڕوونكردنەوەیەكى شەرعی لە لایەن دەستەیەك لە مامۆستایانى سەلەفى كوردستانەوە سەبارەت بەشەرى داعش بەرامبەر بە میللەتى كورد لە چەند ڕوانگەیەكەوە
20/08/2014
ڕوونكردنەوەیەكى شەرعی لە لایەن دەستەیەك لە مامۆستایانى سەلەفى كوردستانەوە سەبارەت بەشەرى داعش بەرامبەر بە میللەتى كورد
لە چەند ڕوانگەیەكەوە
روانگەى یەكەم: سەبارەت بە گەلى كورد
1- ئێمەى مامۆستایانى سەلەفى باوەڕمان وایە كە ولێتەكەمان وڵاتێكى موسڵمانە (سەرەڕاى بوونى كەم و كورتى تیایدا) وە لەبەر ئەوە نە شایستەى بەناو ئەنفالى دوێنێى سەردەمى بەعس بوون وە نە شایستەى بەناو جیهادى ئەمڕۆشن، چونكە جیهاد دژى گەلێكى كافرى دژایەتیكار دەكرێت نەك بەرامبەر گەلێكى موسڵمانى وەكو كورد، وە ئەم هەڵوێستەى مامۆستایانى سەلەفیش هى ئەمڕۆ نیە بەڵكو هەر لە رۆژانى خێڵى حەمەوە و پێشتریش ئەم هەڵوێستەمان بووە.
2- حوكمەتى هەرێمى كوردستان دەستدرێژى نەكردۆتە سەر خاكى هیچ كەسێك بەڵكو تا ئێستاش كۆمەڵێك ناوچەى كوردستان هەیە لە كورد داگیر كراوە، كەوابوو نە بە بیانوى كافربوونەوە ئەم میللەتە شایستەى جیهاد دژ كردنن چونكە باسمان كرد كە میللەتێكى موسڵمانە، وە نە بە بیانوى ستەم و دەست درێژیكاریشەوە شایستەى جیهاد دژ كردنن چونكە دەركەوت كەوا كورد ستەملێكراوو خاك لێ داگیر كراون. وە بە ڕاستى جێگاى سەرسوڕمانە ئەوانەى كە لافى جیهاد لێ دەدەن پشت لە جولەكە بكەن و جیهادى دژ نەكەن كە هەم كافر و هەم داگیركەر و ستەمكارە بەلام چەكەكانیان ئاراستەى گەلى كوردى موسڵمانى سونى مەزهەبى ستەم لێكراو بكەن!.
روانگەى دووەم: سەبارەت بە داعش
1- ئێمەى مامۆستایانى سەلەفى باوەڕمان وایە كە داعش بەهەڵە لە دین حاڵى بوون، وە موسڵمان و كافریان لێ تێكەڵ بووە، وە لە جیاتى دژایەتى كردنى كافرى داگیركەرى ستەمكار موسڵمانى كوردى ستەمكلێكراوى ئاشتیخواز و نەوەكانى صلاح الدین دەكوژن و سەریان دەبڕن. هەر وەك پێغەمبەر صلى الله علیە وسلم فەرموویەتى ((يقتلون أهل الإسلام و يدَعون أهل الأوثان)). واتە: موسڵمانان دەكوژن و واز لەبێباوەڕان دێنن.
2- ئەو بە ناو جیهادەى كە ئەوان دەیكەن لە خزمەتى ئیسلام و موسڵماندا نیە وەكو لە بەرهەمەكەیدا دەركەوتوە و دەریش دەكەوێت، بەڵكو ئەم دەرئەنجامانەى لێ دەكەوێتەوە:
أ- ڕاكێشانى دەستى دوژمن بۆ ناو خاكى موسڵمانان. وە بیانوودان بە دوژمن كە دەست لە ولێتى موسڵمانان وەربدەن.
ب‌- كوشتنى خەڵكێكى زۆر لە موسڵمانانى بێ تاوان
ت‌- بە كوشتدانى گەنجێكى زۆرى ناحاڵى خۆیان
ث- ناشرینكردنى ئیسلام و موسڵمانان
ج‌- نەهێشتنى ئەمن و ئاسایش لە نێو ولێتى موسڵمانان
ح‌- تەسك كردنەوەى بوارى بانگەوازى بۆ دینى خوا
خ‌- كاولكارى و وێرانكارى ولێتانى موسڵمانان و ئاوارەبوونى دەیان هەزار خێزان كە هەرێمى كوردستان جێگایانى كردۆتەوە
د‌- ناشرین كردنى وشەى جیهاد هەروەكو بەعسیەكان وشەى ئەنفالیان ناشرین كرد.
3- بیروبۆچوونى داعش هیچ لە زانایان و مامۆستایانى سەلەفى پشتگیرى ناكات بەڵكو بە پێچەوانەوە تێكڕاى زانایان و مامۆستایانى سەلەفى دژى ئەو بیروبۆچوونە زێدەڕەویەى ئەوانن، هەروەكو چۆن خەواریجەكانى سەردەمى ئیمامى عەلى ڕەزاى خواى لێ بێ هیچ لە ێەحابەیان لەگەڵ نەبوو ئەمڕۆش داعش هیچ لەزانایان ومامۆستایانى سەلەفى شوێنكەوتەى صەحابەیان لەگەڵدا نیە.
4- هیچ كاتێك كەسانى زێدەرەوى تەكفیرى سەلەفى نەبوون وناشبن بۆیە ناحاڵى بوون و نەفامێتیە كە بەوان بوترێت (سەلەفى جیهادى) هەرچەندە ئەو ناوەش لە خۆیان بنێن چونكە بەناو جیهادەكەى ئەوان وەكو جیهادى سەلەف نیە.بەناو جیهادى ئەمڕۆى ئەوان پڕە لە خاڵى رەش وەكو كاولكارى و ڕەشەكوژى و دوورە لەو ڕەوشتە بەرزە پڕ بەزەیەى كە پێغەمبەرى خوا (صلى الله علیە وسلم) و سەلەف لەسەرى بوون.
5- ئامۆژگاریمان بۆ داعشەكان ئەوەیە كە بگەرێنەوە بۆ لاى زانایانى ئەهلى سوونە وە شوێن كەسانێكى نەناسراو و نەزان نەكەون وە دەست هەڵبگرن لە كوشتارى موسڵمانان و لاوازكردنى ئوممەتى ئیسلام، وە داواى لێبوردن لە خواى گەورە و پاشان لە میللەتى كوردى موسڵمان بكەن.
روانگەى سێیەم: هەڵوێست و ئەركى مامۆستایانى ئاینى و بەرپرسانى حوكمى و دەزگاكانى ڕاگەیاندن و پێشمەرگە و تێكڕاى میللەتیش:
یەكەم:ئەركى سەرشانى مامۆستایانى ئاینى: ئەوەیە كە خەڵكى پەروەردە نەكەن لەسەر توند ڕەوى و زێدەڕەوى و حەماسەتێكى بەرەلێ و تەكفیركردنى موسڵمانان چونكە ئەم جۆرە پەروەردە توند ڕوێتیە بەرهەمەكەى بریتى یە لە و واقعەى كە ئەمڕۆ دەیبینین.لەبەر ئەوە پێویستە لەسەریان هەموو كاتێك بەگشتى و ئەمڕۆش بەتایبەتى هەوڵى پەروەردەیەكى میانڕەوى ئەو میللەتەبن لەسەر ئەو ئیسلامەى كە پێغەمبەر و سەلەف لەسەرى بوون.وەهەروەها ئەركى سەرشانیانە كە ورەى خەڵكى كوردستان بەرز بكەنەوە و فێریان بكەن كە پارێزگارى كردن لە موسڵمانان و خاكى ئەم ولێتە واجبێكى شەرعى یە و پێویستە لەسەر تاك تاكى ئەم میللەتە بەم ئەركە پیرۆزە هەستێت.
دووەم: كاربەدەستان:
1- ئەركى سەرشانى كاربەدەستان ئەوەیە كە بەدڵسۆزیەوە پارێزگارى لەم خاك و ولێتە و دەستكەوتەكانى بكەن و بەرژەوەندى گشتى ئەم ولێتە بخەنە پێش هەموو بەرژەوەندیەكى تر.
2- هەروەها ئەركى سەرشانى كاربەدەستانە كە ڕێگرى بكەن لە دروست بوونى گەراى زێدەڕەوى لە ولێتەكەماندا بەلام ئەمە نەكرێت بە بیانویەك بۆ دژایەتى كردنى ئیسلامى ڕاستەقینە.وە پێویستە خۆیان شانازى بە ئیسلامەوە بكەن نەك لە كاردانەوەى كەسانێكى زێدەڕەو خۆیان توشى هەڵە بكەن بەرامبەر بە ئیسلام چونكە تاوەكو ئەوان زیاتر لە خزمەتى ئیسلامدا بن ئەوا زیاتر ڕووڕەشى بۆ كەسانێك دەمێنێتەوە كە بەناوى ئیسلامەوە دژایەتى ئەو میللەتە موسڵمانە دەكەن.
سێیەم:میدیا و دەزگاكانى ڕاگەیاندن:
ئامۆژگاریمان ئەوەیە كە زیاتر هەستیارانەو و ڕاستگۆیانە مامەڵە لەگەڵ ئەم واقعەدا بكەن و هەواڵى بچووك گەورە نەكەن و ئەو میللەتە نەتۆقێنن وە هەندێ شت كە لەبەرژەوەندى میللەت دا نیە باس نەكرێت و بلاونەكرێتەوە.
چوارەم: هێزەكانى پێشمەرگە:
ئامۆژگاریمان بۆ هێزەكانى پێشمەرگە ئەوەیە كە بەدەست و بازویەكى ئیماندارانەو بوێرانەوە پاسەوانى لەم گەلە موسڵمانە و خاكەكەى بكەن و وە خۆڕاگر و تەباو یەكڕیز و ورە بەرزبن و وە پشتیوانیان بەخوا بێت بۆ پاراستن و سەرخستنیان چونكە سەركەوتن تەنها لاى خواى پەروەردگارە وە زۆریادى خوا بكەن و خۆیان بەدوور بگرن لە تاوان وە خۆیان لە پێشتر بزان بۆ خزمەت كردنى ئیسلام و موسڵمانان لە بەرامبەرەكانیان.
پێنجەم: تێكڕایى گەلى كوردستان:
ئامۆژگاریمان بۆ تێكڕاى ئەم میللەتە موسڵمانە ئەوەیە كە ورە بەرز و خۆڕاگر بن وە بە پڕوپاگەندە ورەیان لاواز نەبێت، وە هەریەكێك لە تاك تاكى ئەم میللەتە خۆى بە بەرپرسیار بزانێت لەبەرمبەر پاراستنى ئەمن و ئاسایشى ولاتەكەمان وە ڕێگر بن لەوانەى كە تێكدەر و زێدەڕەو دوژمنى ئەم میللەتەن.وە پشتیوانى هێزەكانى پێشمەرگە بن بە گوێرەى تواناى خۆیان وە وانەزانن كە داعش یانى ئیسلام بەڵكو ئیسلام ئەوەیە كە پێغەمبەر صلى الله عليه وسلم و صەحابە و سەلەف لەسەرى بوون و بەدرێژایى مێژووش میللەتى كوردى موسڵمان شانازیان پێوە كردووە و دەكەن، وە ئومێدیشیان وابێت كە ئەمە فیتنەیەكە و تێدەپەڕێت بە پشتیوانى خواى پەروەردگار.وە پێویستە لەسەر هەموو لایەكمان بەكاربەدەستان و مامۆستایانى ئاینى و تێكڕایى میللەتیش خزمەتى ئاوارە و لێقەوماوان بكەین و هاوكاریان بین.
وە لە كۆتایدا داواكارین لە خواى گەورە كە ئەمن و ئاسایشى ولێتمان بپارێزێ و لە ستەمى دەستدرێژیكاران پەنامان بدات، والحمد لله رب العالمین.
ژماره‌ی بینین‌ : 2940
کۆمێنت
هێچ کۆمێنتێک بەردەست نیە
کۆمێنتی خۆت بنێرە
ناو :  
ئیمێڵ :   
کۆمێنت :
 
زیاتر ...
بە ڤیدیۆ... لە یەكەم شەوی مانگی ڕەمەزان لە ناو كەعبە موعجیزە ڕوویدا ...
بۆجی مەکەی پیرۆز فڕۆکەخانەی تێدانیە؟ ...
موسڵمانان له‌سه‌ر وێنه‌كانی‌ پێغه‌مبه‌ر بۆچونیان جیاوازه‌ ...
خودا باسی قەومی کورد دەکات..! ...
"بوون به‌‌ ئێزدی بۆ ماوه‌یه‌كی كاتی‌‌ گاڵته‌كردنه‌ به‌ ئێزدیه‌كان" ...
نیشانه‌کانی ئاخر زه‌مان بزانه‌ به‌ ته‌واوی ...
فەتوایەکی سەیروسەمەرەی ئیسلامیەکان…!!! ...
ڕوونكردنەوەیەكى شەرعی لە لایەن دەستەیەك لە مامۆستایانى سەلەفى كوردستانەوە سەبارەت بەشەرى داعش بەرامب ...
هاتنى كەسێك بۆمزگەوت كەسیر وپیازى خواردبێ،یان بۆنێكی ناخۆشی پێوەبێ ...
وێنه‌..یه‌كه‌م مزگه‌وت كه‌ دیزانه‌ره‌كه‌ی ئافره‌ت بێت له‌ توركیا ...
12345
  زاهید هه‌ورامی - Zahid Hawrami
Scroll